Muziej Volnaj Biełarusi zaprašaje na viečar-sustreču siabroŭ muzieja
22 lipienia Muziej Volnaj Biełarusi zaprašaje na «Viečar-sustreču siabroŭ Muzieja Volnaj Biełarusi», pryśviečany hadavinie sa dnia adkryćcia ŭstanovy.
17 lipienia 2022 hoda Narodnaje antykryzisnaje ŭpraŭleńnie ŭ centry Varšavy adkryła novuju biełaruskuju prastoru — Muziej Volnaj Biełarusi. Za hod Muziej staŭ adnoj z samych papularnych biełaruskich placovak u Varšavie, taksama viadomaj pa-za miežami polskaj stalicy — razam z suarhanizatarami Muziej pravioŭ bolš za 160 mierapryjemstvaŭ, jakija naviedali zvyš 9 tysiač čałaviek.
22 lipienia va ŭtulnaj siabroŭskaj atmaśfiery, adnačasova na 5-ci placoŭkach, projduć mierapryjemstvy, pryśviečanyja hadavinie sa dnia adkryćcia Muzieja Volnaj Biełarusi.
Pieršaj a 16-j hadzinie pačnie pracu dziciačaja placoŭka, na jakoj haściej čakaje sustreča z artystam Alaksandram Ždanovičam (Malavanyč) — teatralizavanyja hulni, čytańnie kazak i vyrab kazačnych hierojaŭ, pakaz biełaruskaj batlejki — śpiektaklaŭ «Car Irad» i «Pipi Doŭhajapančocha».
Ad 16:00 da 21:00 u dvoryku kala Muzieja budzie pracavać art-markiet, dzie svaje pracy pakažuć talenavityja mastaki i dyzajniery i dzie možna budzie nabyć unikalnyja rečy biełaruskich majstroŭ. Na hetaj ža placoŭcy možna aznajomicca i nabyć knižnyja navinki ad vydaviectva «Januškievič».
Hałoŭnaja placoŭka imprezy — vialiki dvoryk kala Muzieja — adkryjecca a 17-j hadzinie vystupam Varšaŭskaha Volnaha arkiestra. Na cyrymoniju adkryćcia imprezy zaprošanyja pradstaŭniki biełaruskich demakratyčnych siłaŭ, polskich uład, Varšaŭskaj meryi, dypłamaty.
Na hetaj samaj placoŭcy pačniecca kancert-padarunak dla ŭsich siabroŭ, dzie vystupiać znakamityja biełaruskija vykanaŭcy. U prahramie — Siaržuk Doŭhušaŭ, Uładzimir Puhač, Marharyta Laŭčuk z Kanstancinam Haračym.
Halerejnaja prastora Muzieja pakaža tatalnuju instalacyju «Ad kraju da kraju» Ihara Cišyna — praciah dumak znakamitaha biełaruskaha mastaka i ich mastackaje ŭvasableńnie pra siońniašniuju Biełaruś.
U muziejnym pakoi prastory, jaki budzie pracavać ciaham usiaho dnia, možna budzie pabačyć mini-ekspazicyju z samych jarkich ekspanataŭ, padaravanych u fond, pakinuć zapis-zyčeńnie ŭ Knizie hanarovych haściej. Taksama ŭ hety pakoj možna budzie prynieści i padaravać Muzieju pradmiety, źviazanyja z vašaj asabistaj historyjaj udziełu ŭ biełaruskim prateście.
Adras Muzieja Volnaj Biełarusi — Foksal 11, Warszawa.
Čytajcie taksama:
Karcinu biełaruskaha mastaka adabrali dla Łondanskaha art-bijenale
Kamientary