У маскоўскім СІЗА знойдзены мёртвым турагент, затрыманы за арганізацыю падарожжаў для геяў
Адвакатцы паведамілі, што яе кліент скончыў жыццё самагубствам. Пры затрыманні ён зведаў катаванні і здзекі.
Пра смерць дырэктара турфірмы «Мен трэвел» Андрэя Котава паведамляе «ОВД-Инфо» са спасылкай на яго адвакатку.
Следчы па справе Котава паведаміў адвакатцы, што мужчына скончыў жыццё самагубствам у камеры сёння прыкладна а 4-й гадзіне раніцы.
Раней Котаў расказваў, што падчас затрымання сілавікі збівалі яго і катавалі электрашокерам. Таксама яны атрымалі доступ да яго тэлефона і здзекаваліся з інтымнай інфармацыі, пераздымаючы экран. У пачатку снежня арыштаванага бізнэсоўца змясцілі ў карцар.
Котава абвінавачваюць па справе аб «арганізацыі экстрэмісцкай супольнасці» і ўдзеле ў ёй (ч. 1 і 2 арт. 282.2 КК РФ). Паводле следства, 48-гадовы турагент здзейсніў злачынства, «накіраванае супраць канстытуцыйнага ладу і бяспекі дзяржавы».
Паводле адвакаткі, з матэрыялаў справы незразумела, якім чынам Котаў мог удзельнічаць у неіснуючай «экстрэмісцкай ЛГБТ-супольнасці».
Котаў займаўся арганізацыяй тураў для геяў па Волзе і ў Егіпет. Аднак следчы далучыў да справы матэрыялы з асабістай перапіскі затрыманага, якія ніяк не звязаны з арганізацыяй тураў для мужчын.
Блізкі да расійскіх сілавікоў канал «ВЧК-ОГПУ» сцвярджае, што Котаву незадоўга да гібелі было прад'яўлена абвінавачанне ў вырабе дзіцячага порна. Ён быццам бы таемна здымаў на свой мабільны тэлефон непаўналетніх хлопчыкаў у раздзявалках спартыўных клубаў. Канал таксама сцвярджае, што вядома як мінімум, пра два эпізоды.
Год таму Вярхоўны суд Расіі абвясціў неіснуючы «Міжнародны грамадскі рух ЛГБТ» экстрэмісцкай арганізацыяй і забараніў яго дзейнасць у Расіі. Пасля гэтага сілавікі распачалі справы аб экстрэмізме супраць уладальнікаў і супрацоўнікаў бараў у Арэнбургу і Кіраве, дзе праводзіліся вечарынкі з удзелам дрэг-артыстак.
-
У расійскім Нальчыку ветэран захопніцкай вайны ва Украіне пад наркотыкамі да смерці збіў 87-гадовую пенсіянерку
-
Паўночная Карэя выпрабавала стратэгічныя крылатыя ракеты і прыгразіла ЗША
-
ХАМАС адпусціў яшчэ двух ізраільцян. Сярод іх — бацька рудых хлопчыкаў, якія сталі сімвалам трагедыі 7 кастрычніка
Каментары