Мона Ліза пераязджае. Макрон распавёў пра планы маштабнай перабудовы Луўра

У межах перабудовы самы вядомы экспанат Луўра — карціна Леанарда да Вінчы «Мона Ліза» — «пераедзе» ў новае памяшканне, дзе на палатно можна будзе паглядзець асобна ад астатняй калекцыі музея, за асобную плату.

Пра маштабныя планы рэканструкцыі прэзідэнт Эмануэль Макрон распавёў журналістам і парыжскай эліце, стоячы менавіта пад гэтым шэдэўрам Леанарда.

Акрамя асобнага памяшкання для «Джаконды», у музеі з’явіцца другі ўваход для турыстаў, каб хоць неяк разгрузіць асноўны шлях у музей — праз знакамітую шкляную піраміду на плошчы перад палацам.

Канцэпцыя новага ўваходу будзе распрацавана паводле вынікаў міжнароднага архітэктурнага конкурсу.

Паводле слоў Макрона, які выступіў ініцыятарам праекта «Новы Рэнесанс», усе працы павінны заняць каля пяці гадоў, і абноўлены Луўр адкрые свае дзверы наведвальнікам не пазней за 2031 год.

А вось цана ўваходнага білета ў Луўр для наведвальнікаў, якія жывуць за межамі Еўрасаюза, павялічыцца ўжо са студзеня 2026 года.

Праект «Новы Рэнесанс» стаў адказам на скаргі дырэктаркі Луўра Ларанс дэ Кар, якая заяўляла, што перад музеем стаяць сур’ёзныя праблемы, у першую чаргу перагружанасць наведвальнікамі ў умовах разбуранай інфраструктуры.

У лісце да ўрада, апублікаваным у студзені, спадарыня дэ Кар сцвярджала, што піраміда, якая з 1989 года служыць адзіным пунктам пропуску наведвальнікаў у музейныя галерэі, «структурна не здольная справіцца» з патокам турыстаў, які сёння перавышае 9 мільёнаў чалавек у год.

У лісце таксама гаварылася, што «ўсе сходзяцца ў меркаванні, што асаблівую ўвагу неабходна надаць […] умовам дэманстрацыі «Моны Лізы»».

Каля трох чвэрцяў з 30 тысяч штодзённых наведвальнікаў музея прыходзяць у першую чаргу менавіта каб убачыць знакаміты партрэт Леанарда. Аднак з-за неверагоднай папулярнасці палатна яго наведванне можна параўнаць з конкурсам на вынослівасць: наглядчыкі і ахова Луўра бесперапынна праганяюць натоўп праз Залу Мастацтваў, даючы наведвальнікам у сярэднім каля 50 секунд, каб разгледзець карціну і зрабіць фатаграфію.

«Публіка… не мае магчымасці ацаніць працу мастака, што ставіць пад сумнеў саму нашу місію па абслугоўванні грамадства», — падкрэсліваецца ў лісце.

Згодна з праектам Макрона, будзе перабудаваны ўсходні фасад палаца, які сёння ўяўляе сабой класічную каланаду, звернутую да сухога штучнага рова і мала выкарыстоўваемай эспланады.

Новы ўваход адкрые доступ да новых падземных выставачных прастораў, якія размесцяцца пад унутраным дваром палаца Кур-Карэ і будуць, у сваю чаргу, злучаныя з асноўнай зонай, уваход у якую размешчаны пад пірамідай.

Як распавёў Макрон, перабудова фасада — самае буйное змяненне знешняга выгляду музея за апошнія 40 гадоў, з часоў праекта «Вялікі Луўр» Франсуа Мітэрана.

Дварцовую эспланаду плануецца засадзіць дрэвамі, фактычна ператварыўшы яе ў парк, што добра суадносіцца з планамі мэрыі па азеляненні цэнтральнай часткі французскай сталіцы.

Як выказаўся прэзідэнт Макрон, гэта дапаможа «інтэграваць музей у горад і вярнуць яго парыжанам».

Перанос «Моны Лізы» на новае месца дазволіць выставіць карціну на агляд належным чынам, а таксама палегчыць наведвальнікам прагляд іншых шэдэўраў музейнай калекцыі, якія цяпер, паводле Макрона, занадта часта застаюцца па-за ўвагай.

Унутраная інфраструктура Луўра ў бліжэйшыя некалькі гадоў таксама будзе значна мадэрнізавана і пашырана.

Планы ўключаюць мадэрнізацыю старых і будаўніцтва новых туалетаў, рэстаранаў і месцаў для адпачынку.

Агульны кошт праекта ацэньваецца ў некалькі сотняў мільёнаў еўра.

Макрон, аднак, падкрэсліў, што для падаткаплацельшчыкаў маштабная перабудова не будзе каштаваць ні еўрацэнта, паколькі работы будуць фінансавацца выключна за кошт продажу білетаў, ахвяраванняў і даходаў ад партнёрскай здзелкі Луўра з пляцоўкай у Абу-Дабі.

Прэзідэнт Макрон, які паўгода таму нечакана страціў кантроль над парламентам краіны і істотна згубіў палітычны ўплыў, шукае новыя спосабы пакінуць след у гісторыі сваёй краіны.

Падобна на тое, што пасля таго, як сусветная супольнасць пахваліла яго кіраўніцтва рэканструкцыяй Нотр-Дама пасля пажару, Макрон загарэўся ідэяй зрабіць нешта падобнае і з Луўрам.

• 0
• 0
• 0
• 0
• 1
• 0
• 0
• 0